踏入黑色10月，中港股市屢創新低，就連昔日股王騰訊亦愈跌愈有，令不少股民荷包重創，不過更可怕的是，出名是股市毒藥的「丁蟹效應」又再殺到，事關鄭少秋有份參演的電視劇《將夜》將於萬聖節在內地首播！翻查資料，過去廿幾年，每逢秋官有新劇出街，股市例必跌多升少，當中1992年10月播出的《大時代》，秋官於劇中飾演的丁蟹擅長於股災發死人財，咁啱當時港股竟於一個月內暴跌兩成，其後他主演的《笑看風雲》、《天地男兒》等播出時亦遇上跌市，令「丁蟹效應」嚇怕股民，由於丁蟹威力實在太勁，搞到連國際著名投行里昂證券亦發表有關「丁蟹效應」的研究報告，誇張到外國股評家都知道Adam Cheng（鄭少秋）的破壞力。
由於家陣中港股市弱不禁風，若然再整多個「丁蟹效應」，真係唔知點算，難怪唔少股民一知道秋官又有新劇出街，都好擔心再爆股災，「依家都蝕咗三成，唔見幾十萬，再嚟多個丁蟹，真係唔知止唔止蝕好。」「特朗普已經夠可怕，如果佢同丁蟹聯手，恆指隨時見20000」
雖然股民就好驚驚，但唔少劇迷都好期待《將夜》，事關該劇改編自同名小說，由著名導演陳凱歌兒子陳飛宇擔任男主角，劇情講述他如何為家人報仇，是典型武俠片格局，而該劇卡士更十分強勁，有黎明飾演唐王李仲易，而秋官則飾演夫子一角，別看他一頭白髮，就以為只是普通老人家，實情他有超群修為、聰明睿達，一出手就震驚朝野，不過點震都好，希望佢唔好震散股市啦！